112. ปหิเตเยว อนุชานนา

[199 . อิธ ปน, ภิกฺขเว, ภิกฺขุสฺส ภาตา คิลาโน โหติฯ โส เจ ภาตุโน สนฺติเก ทูตํ ปหิเณยฺย – ‘‘อหญฺหิ คิลาโน, อาคจฺฉตุ เม ภาตา, อิจฺฉามิ ภาตุโน อาคต’’นฺติ, คนฺตพฺพํ, ภิกฺขเว , สตฺตาหกรณีเยน, ปหิเต, น ตฺเวว อปฺปหิเตฯ สตฺตาหํ สนฺนิวตฺโต กาตพฺโพฯ

อิธ ปน, ภิกฺขเว, ภิกฺขุสฺส ภคินี คิลานา โหติฯ สา เจ ภาตุโน สนฺติเก ทูตํ ปหิเณยฺย – ‘‘อหญฺหิ คิลานา, อาคจฺฉตุ เม ภาตา, อิจฺฉามิ ภาตุโน อาคต’’นฺติ, คนฺตพฺพํ, ภิกฺขเว, สตฺตาหกรณีเยน, ปหิเต, น ตฺเวว อปฺปหิเตฯ สตฺตาหํ สนฺนิวตฺโต กาตพฺโพฯ

อิธ ปน, ภิกฺขเว, ภิกฺขุสฺส ญาตโก คิลาโน โหติฯ โส เจ ภิกฺขุสฺส สนฺติเก ทูตํ ปหิเณยฺย – ‘‘อหญฺหิ คิลาโน, อาคจฺฉตุ ภทนฺโต, อิจฺฉามิ ภทนฺตสฺส อาคต’’นฺติ, คนฺตพฺพํ, ภิกฺขเว, สตฺตาหกรณีเยน, ปหิเต, น ตฺเวว อปฺปหิเตฯ สตฺตาหํ สนฺนิวตฺโต กาตพฺโพฯ

อิธ ปน, ภิกฺขเว, ภิกฺขุคติโก คิลาโน โหติฯ โส เจ ภิกฺขูนํ สนฺติเก ทูตํ ปหิเณยฺย – ‘‘อหญฺหิ คิลาโน, อาคจฺฉนฺตุ ภทนฺตา, อิจฺฉามิ ภทนฺตานํ อาคต’’นฺติ, คนฺตพฺพํ, ภิกฺขเว, สตฺตาหกรณีเยน, ปหิเต, น ตฺเวว อปฺปหิเตฯ สตฺตาหํ สนฺนิวตฺโต กาตพฺโพฯ

เตน โข ปน สมเยน สงฺฆสฺส วิหาโร อุนฺทฺริยติฯ อญฺญตเรน อุปาสเกน อรญฺเญ ภณฺฑํ เฉทาปิตํ โหติฯ โส ภิกฺขูนํ สนฺติเก ทูตํ ปาเหสิ – ‘‘สเจ ภทนฺตา ตํ ภณฺฑํ อาวหาเปยฺยุํ, ทชฺชาหํ ตํ ภณฺฑ’’นฺติฯ ภควโต เอตมตฺถํ อาโรเจสุํฯ อนุชานามิ, ภิกฺขเว, สงฺฆกรณีเยน คนฺตุํฯ สตฺตาหํ สนฺนิวตฺโต กาตพฺโพติฯ

ปหิเตเยว อนุชานนา นิฏฺฐิตาฯ

วสฺสาวาสภาณวาโร นิฏฺฐิโตฯ

113. อนฺตราเย อนาปตฺติวสฺสจฺเฉทวาโร

[200] เตน โข ปน สมเยน โกสเลสุ ชนปเท อญฺญตรสฺมิํ อาวาเส วสฺสูปคตา ภิกฺขู วาเฬหิ อุพฺพาฬฺหา โหนฺติฯ คณฺหิํสุปิ ปริปาติํสุปิฯ ภควโต เอตมตฺถํ อาโรเจสุํฯ

อิธ ปน, ภิกฺขเว, วสฺสูปคตา ภิกฺขู วาเฬหิ อุพฺพาฬฺหา โหนฺติฯ คณฺหนฺติปิ ปริปาเตนฺติปิฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคตา ภิกฺขู สรีสเปหิ อุพฺพาฬฺหา โหนฺติฯ ฑํสนฺติปิ ปริปาเตนฺติปิฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺส ฯ

อิธ ปน, ภิกฺขเว, วสฺสูปคตา ภิกฺขู โจเรหิ อุพฺพาฬฺหา โหนฺติฯ วิลุมฺปนฺติปิ อาโกเฏนฺติปิฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคตา ภิกฺขู ปิสาเจหิ อุพฺพาฬฺหา โหนฺติฯ อาวิสนฺติปิ หนนฺติปิ [โอชมฺปิ หรนฺติ (สี.), หรนฺติปิ (สฺยา.)]ฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคตานํ ภิกฺขูนํ คาโม อคฺคินา ทฑฺโฒ โหติฯ ภิกฺขู ปิณฺฑเกน กิลมนฺติฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคตานํ ภิกฺขูนํ เสนาสนํ อคฺคินา ทฑฺฒํ โหติฯ ภิกฺขู เสนาสเนน กิลมนฺติฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคตานํ ภิกฺขูนํ คาโม อุทเกน วูฬฺโห โหติฯ ภิกฺขู ปิณฺฑเกน กิลมนฺติฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคตานํ ภิกฺขูนํ เสนาสนํ อุทเกน วูฬฺหํ โหติฯ ภิกฺขู เสนาสเนน กิลมนฺติฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺสาติฯ

[201] เตน โข ปน สมเยน อญฺญตรสฺมิํ อาวาเส วสฺสูปคตานํ ภิกฺขูนํ คาโม โจเรหิ วุฏฺฐาสิฯ ภควโต เอตมตฺถํ อาโรเจสุํฯ อนุชานามิ, ภิกฺขเว, เยน คาโม เตน คนฺตุนฺติฯ

คาโม ทฺเวธา ภิชฺชิตฺถฯ ภควโต เอตมตฺถํ อาโรเจสุํฯ อนุชานามิ, ภิกฺขเว, เยน พหุตรา เตน คนฺตุนฺติฯ

พหุตรา อสฺสทฺธา โหนฺติ อปฺปสนฺนาฯ ภควโต เอตมตฺถํ อาโรเจสุํฯ อนุชานามิ, ภิกฺขเว, เยน สทฺธา ปสนฺนา เตน คนฺตุนฺติฯ

เตน โข ปน สมเยน โกสเลสุ ชนปเท อญฺญตรสฺมิํ อาวาเส วสฺสูปคตา ภิกฺขู น ลภิํสุ ลูขสฺส วา ปณีตสฺส วา โภชนสฺส ยาวทตฺถํ ปาริปูริํฯ ภควโต เอตมตฺถํ อาโรเจสุํฯ

อิธ ปน, ภิกฺขเว, วสฺสูปคตา ภิกฺขู น ลภนฺติ ลูขสฺส วา ปณีตสฺส วา โภชนสฺส ยาวทตฺถํ ปาริปูริํฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคตา ภิกฺขู ลภนฺติ ลูขสฺส วา ปณีตสฺส วา โภชนสฺส ยาวทตฺถํ ปาริปูริํ, น ลภนฺติ สปฺปายานิ โภชนานิฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคตา ภิกฺขู ลภนฺติ ลูขสฺส วา ปณีตสฺส วา โภชนสฺส ยาวทตฺถํ ปาริปูริํ, ลภนฺติ สปฺปายานิ โภชนานิ , น ลภนฺติ สปฺปายานิ เภสชฺชานิฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคตา ภิกฺขู ลภนฺติ ลูขสฺส วา ปณีตสฺส วา โภชนสฺส ยาวทตฺถํ ปาริปูริํ, ลภนฺติ สปฺปายานิ โภชนานิ, ลภนฺติ สปฺปายานิ เภสชฺชานิ, น ลภนฺติ ปติรูปํ อุปฏฺฐากํฯ เอเสว อนฺตราโยติ ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคตํ ภิกฺขุํ อิตฺถี นิมนฺเตติ – ‘‘เอหิ, ภนฺเต, หิรญฺญํ วา เต เทมิ, สุวณฺณํ วา เต เทมิ, เขตฺตํ วา เต เทมิ, วตฺถุํ วา เต เทมิ, คาวุํ วา เต เทมิ, คาวิํ วา เต เทมิ, ทาสํ วา เต เทมิ, ทาสิํ วา เต เทมิ, ธีตรํ วา เต เทมิ ภริยตฺถาย, อหํ วา เต ภริยา โหมิ, อญฺญํ วา เต ภริยํ อาเนมี’’ติฯ ตตฺร เจ ภิกฺขุโน เอวํ โหติ, ‘ลหุปริวตฺตํ โข จิตฺตํ วุตฺตํ ภควตา, สิยาปิ เม พฺรหฺมจริยสฺส อนฺตราโย’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคตํ ภิกฺขุํ เวสี นิมนฺเตติ…เป.… ถุลฺลกุมารี นิมนฺเตติ… ปณฺฑโก นิมนฺเตติ… ญาตกา นิมนฺเตนฺติ… ราชาโน นิมนฺเตนฺติ… โจรา นิมนฺเตนฺติ… ธุตฺตา นิมนฺเตนฺติ – ‘‘เอหิ, ภนฺเต, หิรญฺญํ วา เต เทม, สุวณฺณํ วา เต เทม, เขตฺตํ วา เต เทม, วตฺถุํ วา เต เทม , คาวุํ วา เต เทม, คาวิํ วา เต เทม, ทาสํ วา เต เทม, ทาสิํ วา เต เทม, ธีตรํ วา เต เทม ภริยตฺถาย, อญฺญํ วา เต ภริยํ อาเนมา’’ติฯ ตตฺร เจ ภิกฺขุโน เอวํ โหติ, ‘ลหุปริวตฺตํ โข จิตฺตํ วุตฺตํ ภควตา, สิยาปิ เม พฺรหฺมจริยสฺส อนฺตราโย’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคโต ภิกฺขุ อสฺสามิกํ นิธิํ ปสฺสติฯ ตตฺร เจ ภิกฺขุโน เอวํ โหติ, ‘ลหุปริวตฺตํ โข จิตฺตํ วุตฺตํ ภควตา, สิยาปิ เม พฺรหฺมจริยสฺส อนฺตราโย’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อนฺตราเย อนาปตฺติวสฺสจฺเฉทวาโร นิฏฺฐิโตฯ

114. สงฺฆเภเท อนาปตฺติวสฺสจฺเฉทวาโร

[202] อิธ ปน, ภิกฺขเว, วสฺสูปคโต ภิกฺขุ ปสฺสติ สมฺพหุเล ภิกฺขู สงฺฆเภทาย ปรกฺกมนฺเตฯ ตตฺร เจ ภิกฺขุโน เอวํ โหติ, ‘ครุโก โข สงฺฆเภโท วุตฺโต ภควตา; มา มยิ สมฺมุขีภูเต สงฺโฆ ภิชฺชี’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อสุกสฺมิํ กิร อาวาเส สมฺพหุลา ภิกฺขู สงฺฆเภทาย ปรกฺกมนฺตี’’ติฯ ตตฺร เจ ภิกฺขุโน เอวํ โหติ, ‘ครุโก โข สงฺฆเภโท วุตฺโต ภควตา; มา มยิ สมฺมุขีภูเต สงฺโฆ ภิชฺชี’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ

อิธ ปน, ภิกฺขเว, วสฺสูปคโต ภิกฺขุ สุณาติ – ‘‘อสุกสฺมิํ กิร อาวาเส สมฺพหุลา ภิกฺขู สงฺฆเภทาย ปรกฺกมนฺตี’’ติฯ ตตฺร เจ ภิกฺขุโน เอวํ โหติ – ‘‘เต โข เม ภิกฺขู มิตฺตาฯ ตฺยาหํ วกฺขามิ ‘ครุโก โข, อาวุโส, สงฺฆเภโท วุตฺโต ภควตา; มายสฺมนฺตานํ สงฺฆเภโท รุจฺจิตฺถา’ติฯ กริสฺสนฺติ เม วจนํ, สุสฺสูสิสฺสนฺติ, โสตํ โอทหิสฺสนฺตี’’ติ, ปกฺกมิตพฺพํฯ อนาปตฺติ วสฺสจฺเฉทสฺสฯ